Þelamerkurskóli í Hörgársveit

Í fréttatíma sjónvarpsins í gærkvöldi var sagt frá listsköpunarnámskeiði elstu nemenda skólans. Námskeiðið var í umsjón Aðalheiðar Eysteinsdóttur listakonu. Nemendur notuðu rusl sem þeir fundu hér í skólanum og líka heima hjá sér og gerðu úr því lágmyndir af sjálfum sér.

Fréttamönnum RÚV á Akureyri þóttu þetta áhugavert verkefni og komu í gær til að mynda nemendur og verk þeirra. Einnig voru tekin viðtöl við nokkra þeirra. Á þessari slóð er hægt að skoða fréttina í heild sinni.

Davíð Stefánsson fæddist í Fagraskógi þann 21. janúar árið 1895. Foreldrar hans voru Stefán Baldvin Stefánsson bóndi og síðar alþingismaður og Ragnheiður Davíðsdóttir frá Hofi í Hörgárdal.

Davíð lauk gagnfræðaprófi frá Gagnfræðaskólanum á Akureyri árið 1911. Á árunum 1915-1916 dvaldist hann í Kaupmannahöfn og hófst skáldferill hans þar. Síðar hóf hann nám við Menntaskólann í Reykjavík og lauk þaðan stúdentsprófi árið 1919, en það ár kom fyrsta ljóðabók hans út, hún ber heitið Svartar fjaðrir.

Davíð dvaldist öðru hvoru erlendis, m.a. í nokkra mánuði á Ítalíu árið 1920 og svo í Noregi 1923. Árið 1925 tók Davíð við föstu starfi sem bókavörður á Amtsbókasafninu á Akureyri, hann lét formlega af störfum sem bókavörður árið 1951.

Davíð Stefánsson frá Fagraskógi lést á Akureyri þann 1. mars árið 1964. Hann er jarðaður á Möðruvöllum í Hörgárdal en þar hvíla einnig foreldrar hans og önnur ættmenni.

Í tilefni dagsins sáu nemendur 7. - 8. bekkjar um örlitla dagskrá í matsal skólans. Karlalkórinn Þrymur söng tvö lög og skólahljómsveitin spilaði undir með miklum myndarbrag.

Á kennarafundi í gær var fundaáætlun starfsmanna á vorönn 2012 kynnt. Í henni kemur fram að mest af fundatíma kennara á vorönn verður notaður til að kynningar á nýrri aðalnámskrá og til að kynna sér nýjar leiðir í mati á námi nemenda.

Í febrúar er einnig áformuð námsferð út með Eyjafirðinum, til Dalvíkur og Siglufjarðar. Þar munu kennarar kynna sér þróunarverkefni grunnskólanna þar um nýjar leiðir í námsmati.

Í mars kynna kennarar hver fyrir öðrum hvernig þeir hafa komið fyrir virkni og þátttöku nemenda í verkefnum sem þeim hafa verið falin. Það er hluti af þróunarverkefni skólans sem miðast við að auka áhrif nemenda á eigið nám og umhverfi.

Apríl og maí munu einkennast af undirbúningi fyrir umhverfisviku og útiskóla vordaganna.

Hér er hægt að nálgast fundaáætlun starfsmanna í heild sinni.

Eins og áður hefur komið fram samþykkti fræðslunefnd Hörgársveitar að færa starfsdaginn sem vera átti 10. apríl á þessu ári að 13. janúar. Var það gert vegna þess að stór hluti kennarahópsins er um þessar mundir í London á skólafagsýningunni Bett 2012.

Vegna starfsdagsins fellur fótboltaæfing Smárans niður þennan dag. 

Stýrihópur um mótun skólastefnu Hörgársveitar boðar til íbúaþings laugardaginn 14. janúar kl. 10-14. Þingið verður haldið í Þelamerkurskóla. Þar fer fram fyrsta hugamyndavinna vegna skólastefnu Hörgársveitar.

Skólinn opnar kl. 9:45 og þá verður hægt að fá sér kaffisopa og kleinu áður en þingið hefst formlega. Þingið byrjar á erindi Gunnars Gíslasonar fræðslustjóra Akureyrarbæjar Hvað er skólastefna sveitarfélags og hvaða áherslur setja nýjar aðalnámskrár fyrir skólastarf framtíðarinnar?

Að erindi Gunnars loknu verða hópumræður þar sem fundarmenn svara þremur spurningum:

1. Hvað er gott skólastarf?
2. Hver eru gæði, sérstaða og ímynd skólanna í Hörgársveit?
3. Hvernig bætum við skólana í Hörgársveit?

Gert verður hlé á umræðum milli kl. 12:00 og 12:30 þá geta fundarmenn gætt sér á kjötsúpu í matsal skólans. En það er Kvenfélag Hörgdæla sem sér um veitingar þingsins. Vetingarnar eru fundarmönnum að kostnaðarlausu.

Kl. 13:20 er gert ráð fyrir að hóparnir kynni umræður sínar og niðurstöður þeirra.

Allir íbúar Hörgársveitar eru hvattir til að koma á þingið og að hafa áhrif á mótun skólastefnu sveitarfélagsins.