Þelamerkurskóli í Hörgárbyggð

Á morgun, fimmtudagin 27. maí, verða nemendur skólans á faraldsfæti. Nemendur 1.-6. bekkjar fara til Hjalteyrar. Þar er áformað að dorga á bryggjunni, smíða báta og fleyta þeim á tjörninni, sulla í tjörninni og veiða í henni bjöllur, síli og annað sem þar finnst. Einnig á að leika sér við sandkastalagerð í fjörunni. Grillið verður með í för; grillaðar verða pylsur og einnig sykurpúðar.

Lagt verður af stað klukkan 9:00 eftir að nemendur hafa fengið sér morgunmat og heimferð frá Hjalteyri er áætluð kl. 14:00. Því geta foreldrar reiknað með nemendum heim á sama tíma og venjulega.

Nemendur 7.-10. bekkjar fara í Mývatnssveit. Þar ætla þeir að skoða Dimmuborgir og Kröflu. Nemendur verða komnir heim fyrir venjulega brottför.

Föstudaginn 28. maí er vorhátíð skólans. Þá koma nemendur á venjulegum tíma í skólann og verða með umsjónarkennara í fyrsta tíma. Morgunmatur er á sama tíma og venjulega, kl. 9:10 og eftir morgunmat, kl. 9:30 verður haldið niður í íþróttahús og þar hefst skipulögð dagskrá sem varir í um það bil klukkustund. Síðan verður farið í sund. Nemendur eru minntir á að taka með sér sundfötin.

Að sundinu loknu, kl. 11:30 verður haldið upp að fánastöng skólans er þar verður Grænfáninn dreginn að húni við hátíðlega athöfn. Að lokum verður boðið uppá grillaða hamborgara og leiki uppi á skólalóð.

Reiknað er með að dagskránni sé lokið kl. 13:30.

Mánudaginn 31. maí klukkan 14:00 verður skólanum slitið í Hlíðarbæ.

Í dag lifnaði heldur yfir myndasíðu skólans. Þangað flæddu inn myndir sem hafa verið teknar nú í maí.

Eins og fram hefur komið er maí annasamur dagur í skólanum okkar og þá er sem endranær teknar margar myndir. Á myndasíðunni er nú að finna myndir frá hreinsunarátaki 8. og 9. bekkjar, vorhátíð 3.-5. bekkjar, hreinsunardegi yngstu nemenda, heimsókn þeirra í Litla Dunhaga, Þelamerkurleikunum og frá valtímum hjá elstu nemendum, bæði við snyrtingar á sjálfum sér og utan dyra.

Í dag heimsóttu okkur þrír fulltrúar frá Landvernd til að gera úttekt á skólanum okkar og meta hvort við værum komin það langt í vinnu okkar í umhverfismálum að við fengjum að flagga Grænfánanum.

Við byrjuðum úttektina á að fara yfir umhverfisskýrsluna og gátlista sem við höfðum fyllt út í vetur og sent Landvernd í mars sl. og fjölluðum jafnframt um störf okkar og helstu áherslur. Síðan hitti Landverndarfólk umhverfisnefnd skólans og átti með henni  gott spjall. Að lokum var farið í vettvangsferð um skólann, flokkunarstöðvar skoðaðar, kíkt í heimsókn í bekki og rætt við nemendur og loks farið á útiskólasvæðið okkar góða, sem er í takt við markmið Grænfánaverkefnisins.

Fljótlega eftir úttektina fengum við tilkynningu frá Landvernd að við fengjum Grænfánann! Við stefnum að því að flagga honum nú í skólalok.

Til hamingju nemendur og starfsfólk Þelamerkurskóla.