Þelamerkurskóli í Hörgársveit

Skólahverfi  Þelamerkurskóla er mjög víðfermt og aðstæður misjafnar. Foreldrar þurfa undir öllum kringumstæðum að meta það hvort barn eigi erindi í skólann jafnvel þótt enginn tilkynning hafi borist um niðurfellingu skólahalds.  Foreldrar tilkynna skólanum og skólabílstjóra um forföll vegna veðurs og lítur skólinn á slík tilvik sem eðlileg forföll.                                                                                                                                                           Í allri tvísýnu skal öryggi barnsins njóta vafans.

Skólaakstur:
Ef útlit er tvísýnt og veður vond taka skólayfirvöld í samráði við bílstjóra og íbúa á jaðarsvæðum ákvörðun um að skólahald falli niður vegna veðurs og eða ófærðar. Til viðbótar við skólabílstjóra er hringt í Jón Þór Brynjarsson Hjalteyri í síma 462-5704 og 893 6104 og Gunnar í Búðarnesi í síma 462 6892. Stefnt skal að því að ákvörðun um niðurfellingu skólaaksturs liggi fyrir kl. 7.00 á morgnana.  

 Ef skólahaldi er aflýst fer eftirfarandi ferli í gang.

Upplýsingagjöf:

1.     Tilkynningu um niðurfellingu skólaaksturs er sett á heimasíðu skólans http://thelamork.is. Þetta gerir skólastjóri eða aðstoðarskólastjóri ekki seinna en kl. 7.00.

2.     Sendur er tölvupóstur á Ríkisútvarpið ( ruv.is) og Bylgjuna (bylgjan.is). Þetta gerir
skólastjóri eða aðstoðarskólastjóri.

Ef senda þarf nemendur heim á skólatíma.

Ef upp koma þær aðstæður að senda þarf nemendur heim á skólatíma fer eftirfarandi ferli í gang.

1.     Frétt um að skólahaldi sé frestað er sett á vef skólans.

2.     Skólastjórnendur skipuleggja úthringingu til foreldra. Miðað er við að það sé haft samband við foreldra/forráðamenn nemenda í  1. - 6. bekk.  Eldri nemendur fá að hringja heim.

 3.     Hringingar heim eru til þess að tryggja að einhver fullorðinn taki á móti nemendum úr skólabílnum.

Í síðustu viku vorum við með þemavinnu frá mánudegi til föstudags. Þemað var í fimmta til sjöunda tíma. Boðið var uppá fimm hópa og tengdust viðfangsefni þeirra markmiðum heilsueflandi skóla. Þessir  hópar voru:

1. Veggverk - Hörgársveit. Yfirlitsmynd af Hörgársveit var máluð á vegg á timburgangi. Einnig horfði yngri hópurinn á mynd um Djáknann frá Myrká en eldri nemendur leituðu að upplýsingum um fræga staði í Hörgársveit. 

2. Fræðsla og veggspjöld. Nemendur unnu ýmis heilsuverkefni. 1. - 4. bekkur fékk fræðslu um tannheilsu. 5. - 6. bekkur lærði um 6 H heilsunnar. 7. - 8. bekkur fékk fræðslu um líkamlega og andlega heilsu og 9. - 10. bekkur lærði um skaðsemi reykinga.

3. Dans og slökun. Inga Magga danskennari kenndi dansa í 5. og 6. tíma og síðan var slökun í 7. tíma. 

4. Matreiðsla. Nemendur voru fræddir um ávexti, grænmeti og vítamín. Búið var til skyrbúst.

5. Fjölgreindarkenning. Nemendur fengu kennslu í skák. Kennari var Hjörleifur Halldórsson skáksnillingur.

Var það samdóma álit kennara að þemað hefði verið vel heppnað og langflestir nemendur voru áhugasamir og duglegir.

Í fréttatíma sjónvarpsins í gærkvöldi var sagt frá listsköpunarnámskeiði elstu nemenda skólans. Námskeiðið var í umsjón Aðalheiðar Eysteinsdóttur listakonu. Nemendur notuðu rusl sem þeir fundu hér í skólanum og líka heima hjá sér og gerðu úr því lágmyndir af sjálfum sér.

Fréttamönnum RÚV á Akureyri þóttu þetta áhugavert verkefni og komu í gær til að mynda nemendur og verk þeirra. Einnig voru tekin viðtöl við nokkra þeirra. Á þessari slóð er hægt að skoða fréttina í heild sinni.

Davíð Stefánsson fæddist í Fagraskógi þann 21. janúar árið 1895. Foreldrar hans voru Stefán Baldvin Stefánsson bóndi og síðar alþingismaður og Ragnheiður Davíðsdóttir frá Hofi í Hörgárdal.

Davíð lauk gagnfræðaprófi frá Gagnfræðaskólanum á Akureyri árið 1911. Á árunum 1915-1916 dvaldist hann í Kaupmannahöfn og hófst skáldferill hans þar. Síðar hóf hann nám við Menntaskólann í Reykjavík og lauk þaðan stúdentsprófi árið 1919, en það ár kom fyrsta ljóðabók hans út, hún ber heitið Svartar fjaðrir.

Davíð dvaldist öðru hvoru erlendis, m.a. í nokkra mánuði á Ítalíu árið 1920 og svo í Noregi 1923. Árið 1925 tók Davíð við föstu starfi sem bókavörður á Amtsbókasafninu á Akureyri, hann lét formlega af störfum sem bókavörður árið 1951.

Davíð Stefánsson frá Fagraskógi lést á Akureyri þann 1. mars árið 1964. Hann er jarðaður á Möðruvöllum í Hörgárdal en þar hvíla einnig foreldrar hans og önnur ættmenni.

Í tilefni dagsins sáu nemendur 7. - 8. bekkjar um örlitla dagskrá í matsal skólans. Karlalkórinn Þrymur söng tvö lög og skólahljómsveitin spilaði undir með miklum myndarbrag.

Á kennarafundi í gær var fundaáætlun starfsmanna á vorönn 2012 kynnt. Í henni kemur fram að mest af fundatíma kennara á vorönn verður notaður til að kynningar á nýrri aðalnámskrá og til að kynna sér nýjar leiðir í mati á námi nemenda.

Í febrúar er einnig áformuð námsferð út með Eyjafirðinum, til Dalvíkur og Siglufjarðar. Þar munu kennarar kynna sér þróunarverkefni grunnskólanna þar um nýjar leiðir í námsmati.

Í mars kynna kennarar hver fyrir öðrum hvernig þeir hafa komið fyrir virkni og þátttöku nemenda í verkefnum sem þeim hafa verið falin. Það er hluti af þróunarverkefni skólans sem miðast við að auka áhrif nemenda á eigið nám og umhverfi.

Apríl og maí munu einkennast af undirbúningi fyrir umhverfisviku og útiskóla vordaganna.

Hér er hægt að nálgast fundaáætlun starfsmanna í heild sinni.