Efni
Hefðir og venjur
Dagur Davíðs Stefánssonar skálds frá Fagraskógi er haldinn hátíðlegur í skólanum 21. janúar ár hvert. Dagskráin er í höndum 8. bekkjar. Dagskráin hefur verið í hádeginu þar sem nemendur hafa verið með upplestur og söng.
Þorrablót er hjá öllum bekkjum í skólanum í febrúar. 1. - 6. bekkur heldur sitt þorrablót á þorrablótsdaginn. 7. - 10. bekkur heldur sitt þorrablót um kvöldið. Umsjón með þorrablóti 7. - 10. bekkjar er í höndum 9. bekkjar. Á blótið er boðið starfsfólki skólans og mökum þeirra, nemendum í 7. - 10. bekk, foreldrum 9. og 10. bekkinga og bílstjórum og mökum þeirra.
Síðasti kennsludagur er í umsjón foreldraráðs og kennara. Boðið er upp á skipulagða dagskrá í íþróttahúsi og sundlaug. Síðan er farið upp í skóla og etinn grillmatur. Eftir það er farið í ýmsa leiki.
Keppni milli kennara og nemenda er haldin einu sinni á skólaárinu. Þá keppa kennarar og nemendur í ýmsum greinum íþrótta.
Útivistardagur er tvisvar á skólaárinu. Fyrri önnina er farið á skauta og á vorönninni er farið á skíði upp í Hlíðarfjall.
Eftir samræmdu prófin fara nemendur 10. bekkjar í óvissuferð sem er í umsjón foreldrafélagsins.
Síðasta kennsludag fyrir jól heldur hver bekkur sín stofujól. Eftir stofujólin er borðaður hátíðarmatur í borðsalnum og síðan dansað kringum jólatré. Um kvöldið er jólaball fyrir 7. - 10. bekk.
SAM-skólaböll eru fjórum sinnum á skólaárinu og einn íþróttaviðburður hjá hverju stigi.SAM-skólaböllin eru ætluð nemendum í 8. - 10. bekk. 7. bekkur má mæta á heimaböll SAM-skólanna.
Dagur íslenskrar tungu sem er 16. nóvember er alltaf haldinn hátíðlegur í skólanum. Þennan dag fæddist Jónas Hallgrímsson þjóðskáldið mikla frá Hrauni í Öxnadal. Umsjón með deginum er í höndum miðstigs.
Sláturdagur. Á þessum degi er búið til slátur í skólanum.
