Fréttir

Á vordögum var margt skemmtilegt í gangi í skólanum og nemendur ljómuðu upp til hópa í fjölbreyttum verkefnum og leik. Í vorferðinni okkar fengum við dýrðlegt veður og nemendur nutu sín gríðarlega vel í sandkastalagerð í stórri fjöru, ljósmyndaratleik, safnaferð og sundi. Á Þelamerkurleikunum reyndu nemendur við ýmis verkefni, eins og að kasta stígvéli og bolta, stökkva langstökk, hlaupa tröppuhlaup eða bera brúsa í bændagöngu. Vorhátíðin okkar var svo lífleg og skemmtileg að vanda og lauk með skólaslitum, fyrst þeirra yngri og síðar um daginn þeirra eldri.

Við Þelamerkurskóla er laus til umsóknar 50% staða skólaritara á skrifstofu skólans. Starfið felur í sér ýmis skrifstofustörf tengd skipulagi skólastarfs og þjónustu við nemendur. Í Þelamerkurskóla er starfað með markvissum hætti í anda skóla fyrir alla og þannig lögð rík áhersla á að búa öllum nemendum aðstæður til náms við hæfi hvers og eins, nokkuð sem krefst sveigjanleika og skapandi hugsunar hjá öllu starfsfólki. Einkunnarorð skólans eru þroski, menntun og samkennd. Í skólanum er starfað eftir hugmyndafræði Jákvæðs aga og Byrjendalæsis. Skólinn er heilsueflandi skóli auk þess sem áhersla er lögð á útikennslu, rafræna kennsluhætti og skapandi starf.

Í gær fór fram lokahátíð Stóru upplestrarkeppninnar í 7. bekk en á lokahátíðinni lásu tveir fulltrúar frá hverjum af sex skólum við Eyjafjörð bæði texta og ljóð fyrir fullum sal af áhorfendum. Nemendur hafa síðustu vikur og mánuði æft upplestur á ólíkum textum í bundnu og óbundnu máli og hafa einnig fengið leiðsögn um líkamstjáningu, stöðu, augnsamband við áhorfendur og raddbeitingu. Það var mjög ánægjulegt að hlusta á þessa flottu krakka sem greinilega höfðu lagt mikið á sig í æfingaferlinu. Okkar fólk, Hector Leví og Efemía Birna stóðu sig virkilega vel og það fór ekki á milli máli að þau hafa bæði öðlast dýrmæta reynslu og færni með þátttöku sinni. Við óskum þeim innilega til hamingju með góða frammistöðu.

Í kvöld tók vaskur hópur úr Þelamerkurskóla þátt í Skólahreysti ásamt níu öðrum skólum. Krakkarnir sýndu kraft og dugnað og stóðu sig öll vel. Fyrir hönd skólans kepptu þau Ester Katrín, Björn Sigurður, Sandra Björk og Jósef Orri. Það er skemmst frá því að segja að Ester Katrín bætti ekki bara eigin sigurtíma frá síðasta ári í hreystigreip, heldur sló hún Íslandsmet og hefur þarmeð hangið lengst allra á stönginni frá upphafi Skólahreystis! Ester hékk í 17 mínútur og 20 sekúndur, sem er mikið afrek. Við óskum Ester og liðsfélögum hennar innilega til hamingju með frábæra frammistöðu og þökkum grænu og glöðu stuðningsliði fyrir kraftinn í stúkunni.

Eftir að hafa komist áfram í undankeppni Fiðrings í síðustu viku, slógu þær Juliane Liv, Kaja Líf, Lára Rún og Ester Katrín í gegn á sviðinu í Hofi í gær, á sjálfu úrslitakvöldi hæfileikakeppninnar, fyrir fullum sal af áhorfendum. Lilja Lind sá um tæknimálin fyrir hópinn og Margrét Sverrisdóttir leikkona var stelpunum til halds og traust í hugmynda, hönnunar og æfingaferlinu. Frammistaða hópsins var stórkostleg og óskum við þeim hjartanlega til hamingju með árangurinn. Stelpurnar sömdu atriði sitt sjálfar frá grunni og tókust þær af krafti á við mikilvæg málefni kynjafræðinnar.

Önnur af tveimur undankeppnum Fiðrings, hæfileikakeppni grunnskóla á Norðurlandi, var haldin í Laugarborg í gær. Lið Þelamerkurskóla stóð sig frábærlega á sviðinu með kraftmikiði og áhrifaríkt atriði sem stelpurnar hönnuðu sjálfar frá grunni. Margrét Sverrisdóttir leikkona var þeim til halds og trausts í gegnum allt ferlið. Hópinn skipa þær Ester, Katrín Kaja Líf, Lára Rún og Juliane Liv. Þrír skólar af sex komust áfram og brutust út mikil fagnaðarlæti þegar úrslitin voru kynnt, en okkar stelpur tryggðu Þelamerkurskóla sæti á úrslitakvöldi Fiðrings sem haldið verður í Hofi þriðjudaginn 25. apríl kl 20.

Hector Leví og Efemía Birna hafa verið valin sem fulltrúar skólans á lokahátíð Stóru upplestrarkeppni 7. bekkinga við Eyjafjörð, sem haldin verður í næstu viku. Markmið hátíðarinnar að vekja athygli og áhuga á vönduðum upplestri og framburði. Á hátíðinni fluttu 7. bekkingar stutta kafla úr Þín eigin þjóðsaga eftir Ævar Þór Benediktsson ásamt tveimur ljóðum að eigin vali. Nemendur höfðu æft af kappi og bar upplesturinn þess skýr merki. Allir nemendur skólans hlustuðu með athygli á samnemendur sína og að upplestri loknum voru flutt ljúf tónlistaratriði frá þremur nemendum skólans. Til að meta upplestur og framburð þessara flottu nemenda voru fengnir þrír afbragðs dómarar, þau Jenný Gunnbjörnsdóttir kennari og kennsluráðgjafi, Anna Rósa Friðriksdóttir kennari og Oddur Bjarni Þorkelsson sóknarprestur. Það voru þau EFemía Birna Björnsdóttir og Hector Leví Hilmarsson sem voru valin til að vera fulltrúar skólans á lokahátíð Stóru upplestrarkeppninnar, en hún verður haldin hátíðlega í Hlíðarbæ fimmtudaginn 27. apríl kl. 15. Varamaður Efemíu og Hectors er Arnsteinn Ýmir. Við óskum nemendum til hamingju með flotta frammistöðu.

Í útiskóla síðasta þriðjudag skunduðu fimmti og sjötti bekkur af stað og týndu upp heilan helling af rusli af skólalóðinni. Það sem kom okkur á óvart var hversu mikið af nikotínpúðum voru hér og þá helst í kringum sparkvöllinn og nálægt íþróttahúsinu. Við hættum að telja þegar við vorum komin yfir nokkra tugi. Við vorum sammála um að okkur fannst að fólk sem kemur í íþróttahúsið eða á skólalóðina mætti ganga töluvert betur um. Við vissum að fleiri nemendur hafa verið duglegir að plokka reglulega í allan vetur og vitandi það, fannst okkur þetta alltof mikið rusl. Vonandi fer fólk að ganga betur um og við minnum alla á að plokkdagurinn stóri er 30. apríl n.k. Hvetjum við alla til að taka vorhreingerningu í sínu nærumhverfi, eða bara að plokka þar sem það vill plokka, því öll viljum við hafa hreint og fínt í kringum okkur. Munið bara eftir góðum vinnuhönskum eða plokkara ;)