Vasaljós, kakó og lummur í útiskóla 3.-4. bekkjar

Hvað gæti mögulega verið betra á myrkum morgni í lok nóvember en að fara í ævintýraferð? Við í 3. og 4. bekk breyttum út af vananum og höfðum útiskólann í byrjun dags þegar myrkrið var sem mest og aðeins jólaljósin og snjórinn gáfu birtu. Við vorum sniðug og tókum með okkur vasaljós að heiman og fengum líka vasaljós í skólanum. Í útskóla byrjum við alltaf á því að fara í röð úti fyrir framan gluggann á stofu 3. bekkjar. Þegar við erum komin þangað skoðum við hvort öll hafi munað að klæða sig vel. Það er mjög mikilvægt að vera vel búinn í útiskóla. Þegar öll voru tilbúin kveiktum við á vasaljósunum og lögðum af stað út í Mörk en það er útiskólasvæðið okkar. Við erum orðin meistarar í að kveikja eld. Við gætum öryggis, við náum í þurran eldivið og leggjum spýturnar þannig að það komi gott bál. Fyrr í haust söfnuðum við eldivið og settum inn í skúrinn okkar til að nýta þegar kæmi gott veður til að kveikja upp. 

Meðan fullorðna fólkið gætti eldsins og undirbjó fyrir okkur kræsingar lékum við okkur í skóginum. Það var mjög gaman að skoða skóginn með vasaljósi. Hann lítur allt öðruvísi út þegar hann er skoðaður í myrkri með litlu ljósi. Við fórum í jafnvægisleik á köðlunum og síðan kveiktum við líka á litlu friðarkerti og settum inn í Kotru. Það var litla bálið okkar. Sum okkar borðuðu lummur og drukku kakó þar inni en sum fóru um allan skóg og náðust varla á mynd, ekki frekar en skógarálfarnir. 

Hér eru myndir úr ævintýraferðinni.

Lummurnar voru gómsætar og kakóið ljúffengt. Við gætum alveg vanist svona morgunverð. 

Kveðja frá okkur í 3. og 4. bekk