Fréttir

Í haust kynntu nemendur sér hugtök eins og vistkerfi og lífbreytileiki. Þau lásu í bókum, horfðu á fræðslumyndbönd og öfluðu sér upplýsinga um fjölbreytt efni.

Nemendur í 3. og 4. bekk luku nýverið afar áhugaverðri og fjölbreyttri þemavinnu í Byrjendalæsi þar sem humlur voru í aðalhlutverki.

Þelamerkurskóli átti frábæran dag á Grunnskólamóti á Laugum sem fram fór á Laugum föstudaginn 25. september. Um 240 nemendur frá 11 grunnskólum tóku þátt í mótinu og komu víða að, allt frá Vopnafirði að Hörgársveit. Það var virkilega góð þátttaka frá okkur og fóru alls 31 nemandi úr 7.-10. bekk. Þetta er íþróttamót og kepptu þau í fjölbreyttum íþróttagreinum, þrautabraut, skotbolta, körfubolta og blaki. Þau sem ekki vildu taka þátt í íþróttakeppninni stóðu sig vel í að styðja samnemendur sína og hvatningin var gríðarleg. Stemmingin var frábær allan daginn og allir lögðu sig fram við að ná sem bestum árangri. Nemendur voru til fyrirmyndar og stóðu sig einstaklega vel á öllum vígstöðum.

Ólympíuhlaup ÍSÍ, sem áður hét norræna skólahlaupið, hefur verið fastur liður í skólanum til fjölda ára. Hlaupið fór fram 17. september síðastliðinn í Hálsaskógi. Byrjað var á sameiginlegri upphitun og síðan gátu nemendur valið um að hlaupa, skokka eða ganga 2,5 eða 5 km hring í skóginum. Fjölmargir nemendur fóru fleiri en einn hring.

Á útivistardegi skólans höfðu 5.-10. bekkingar val um fjórar ferðir; veiðiferð, fjallgöngu, gönguferð um Glerárdal og krossaraferð. Dágóður hópur nemenda reyndi fyrir sér við veiðar í Hörgá en það er nýjung að bjóða upp á veiðiferð á útivistardegi skólans. Nemendur, starfsfólk og nokkrir úr hópi foreldra gengu niður að ósum Hörgár ásamt þeim Helga Steinssyni og Guðmundi Víkingssyni sem veittu nemendum leiðsögn og aðstoð. Þrátt fyrir að ekkert hafi veiðst skemmtu nemendur sér við margvíslega iðju, svo sem sílaföngun, vaða í tjörnum og grynningum, ganga um svæðið og spjalla við vini sína og borða grillaðar pylsur við árbakkann.

Nemendur í 1. til 4. bekk áttu dásamlegan útivistardag sl. þriðjudag. Ferðinni var heitið niður í Gáseyri þar sem leikur, fróðleikur og samvera réðu ríkjum. Nemendur nýttu tímann vel til að rannsaka umhverfið og fannst ævintýri að skoða lífríkið við sjóinn. Í fjöruborðinu leyndust ýmsir leyndardómar og fundu krakkarnir meðal annars litla fiska, marglyttur og krabba sem vöktu mikla kátínu. Þá var einnig safnað allskyns steinum og skeljum, þar á meðal fallegum bláskeljum.

Hollvinir Húna II buðu 5.-6. bekkingum í siglingu í mánudaginn 7. september. Ferðin er skipulögð í samstarfi við Háskólann á Akureyri og um borð fá nemendur að kynnast sjávarútvegi og fræðast um lífríki sjávar og sérkenni Eyjafjarðar.

Þelamerkurskóli auglýsir eftir matartækni eða matráði í 100% starf í afleysingu í mötuneyti skólans um óákveðin tíma.

Í dag sýndu krakkarnir í 9. og 10. bekk frábært fordæmi. Þau fóru saman út í blíðuna og tíndu rusl í kringum skólalóðina okkar af miklum krafti. Sýndu þau góða samvinnu og er umhverfið okkar mun snyrtilegra en það var áður.