Fréttir

Upptakturinn - tónsköpunarverðlaun barna og ungmenna er verkefni sem hvetur börn og ungmenni til að semja tónverk og senda inn í keppnina. 10 tónverk eru valin til útsetningar af landsfrægu tónlistarfólki. Í kjölfarið eru svo haldnir tónleikar í Hofi þar sem þessi 10 verk eru flutt af atvinnuhljóðfæraleikurum. Anna Lovísa Arnarsdóttir í 10. bekk Þelamerkurskóla var ein þeirra útvöldu en hún samdi tónverkið Eyrun mín sjá liti. Magnað verk hjá Önnu og við óskum henni innilega til hamingju.

Þelamerkurskóli, í samstarfi við Miðstöð skólaþróunar við HA, hlaut nýverið veglegan styrk til að þróa áfram teymiskennslu við skólann. Styrkurinn er sá hæsti sem úthlutað var í ár og er skólinn afar þakklátur fyrir þennan góða styrk og fullur tilhlökkunar til að þróa áfram árangursríkt verkfæri í skólastarfi. Í Þelamerkurskóla hefur verið unnið markvisst með faglega teymisvinnu undanfarin ár, þar sem megináherslan hefur verið á að skapa traust og virðingu sem grundvöll hreinskiptra samskipta auk vinnubragða sem leggja áherslu á virka þátttöku allra í teyminu. Þá hefur verið lögð rík áhersla á markvissa ígrundun og jafningjastuðning. Næsta skref er að færa samstarfið einnig inn í kennslustofuna í enn virkari teymiskennslu og stefnt er að því að teymiskennsla verði grunneining starfshátta við skólann.

Forsetakosningar fóru fram í Þelamerkurskóla miðvikudaginn 29. maí.

Þriðjudaginn 28. maí 2024 fóru 3. og 4. bekkur í Þelamerkurskóla í skoðunarferð á Ós.

Við Þelamerkurskóla eru laus til umsóknar afleysingarstaða umsjónarkennara í 5.-6. bekk, með möguleika á áframhaldandi ráðningu. Óskað er eftir að ráða skipulagða, sveigjanlega og skapandi grunnskólakennara með mikla hæfni í samskiptum við börn. Umsjónarkennarinn vinnur í teymi með öðrum kennurum. Í skólanum eru um 100 nemendur. Á yngsta stigi verður frá haustinu 2024 einn bekkur í hverjum árgangi og í 5.-10. bekk er samkennsla tveggja árganga.

Þelamerkurskóli óskar eftir barngóðri og metnaðarfullri manneskju í 100% starf. Starfið felur í sér að hafa umsjón með og styðja við nemendur í matsal, frímínútum, á göngum, skólalóð og frítímum auk þess að halda skólahúsnæðinu hreinu. Jafnframt getur til fallið önnur gæsla og tilfallandi stuðningur eftir þörfum Í Þelamerkurskóla eru tæplega 100 nemendur. Skólinn er heilsueflandi skóli og Grænfána skóli. Jafnframt leggur skólinn áherslu á útinám og fjölbreytileika í skólastarfi, nokkuð sem krefst sveigjanleika og þátttöku alls starfsfólks.

Umhverfisdagur skólans var haldinn í dag. Hefðbundin stundatafla var brotin upp og allt starfsfólk og nemendur gengu í hin ýmsu vorverk.

Verkefni umhverfisnefndar eru mörg og fjölbreytt. Nemendur hafa sinnt hænunum, moltu skólans, unnið verkefni og sótt landshlutafund grænfánans.

Lið Þelamerkurskóla gerði sér lítið fyrir og sigraði sinn riðil í Skólahreysti sl. þriðjudagskvöld. Liðið skipa þau Björn Sigurður, Ester Katrín, Jósef Orri og Sandra Björk. Til vara voru þau Anna Lovísa og Alex Jón tilbúin að stökkva til. Keppt var í fjórum greinum og sigraði okkar fólk þrjár greinar af þeim fjórum. Þessi frábæri árangur skilaði liðinu 1. sætinu og um leið sæti í úrslitakeppni Skólahreystis á Íslandi, en hún verður haldin í Laugardalshöll þann 25. maí nk.

Í gær var Stóra upplestrarhátíð skóla við Eyjafjörð haldin við hátíðlega athöfn á Grenivík. Nemendur úr 7. bekk í sex skólum við Eyjafjörð lásu þar ýmist bókarkafla eða ljóð, áhorfendum til mikillar ánægju. Augljóst var að nemendur höfðu æft sig vel og stóðu þau sig öll með stakri prýði. Þær Tinna Margrét og Ylva Sól lásu fyrir hönd Þelamerkurskóla og gerðu það afbragðs vel. Ylva Sól gerði sér lítið fyrir og sigraði keppnina í ár, okkur öllum til mikillar ánægju.