Fréttir

Ákveðið hefur verið að fresta árshátíð skólans sem vera átti fimmtudaginn 4. febrúar vegna kór­ónu­veirunn­ar. Ákvörðunin er tek­in í varúðarskyni en stefnt er að því að halda árs­hátíðina fimmtudaginn 25. mars.

Þelamerkurskóli óskar nemendur, foreldrum, starfsfólki og samstarfsaðilum gleðilegrar jólahátíðar og farsældar á nýju ári, með kæru þakklæti fyrir gott samstarf á árinu sem senn er á enda. Megi nýtt ár færa okkur öllum gleði, frið og takmarkalausa samveru.

Litlu jólin eru haldin hátíðleg í Þelamerkurskóla ár hvert með fjölbreyttri dagskrá. Í Möðruvallarkirkju áttum við í dag notalega stund þar sem tónlist var í aðalhlutverki en barnakór skólans söng undurfallega auk þess sem hljóðfæraleikarar úr hópi nemenda léku listir sínar. Heima í skóla var sungið við jólatréð og nemendur héldu svo stofujól með kennurum sínum. Dagurinn endaði svo eins og hefð er fyrir, með hátíðarmat úr smiðju kokksins, kalkún og meðlæti og að sjálfsögðu ís í eftirmat. Yndislegur dagur með sérlega fallegum börnum.

Fimmtudaginn 17. desember áttum við skemmtilegan dag með löngu nafni! Nemendur fóru á milli stöðva ýmist á útisvæðum eða í íþróttahúsi og þeir sem vildu fóru í sund og yljuðu sér innan um fallegu jólaljósin sem prýða sundlaugina okkar. Úti í Mörk voru það vasaljós, höfuðljós og glitstangir sem lýstu upp myrkrið og í eldstæðinu okkar logaði eldurinn sem hitaði upp vatnið í heita kakóið. Nemendur grilluðu sykurpúða og gæddu sér á piparkökum með kakóinu. Hangikjötið hennar Huldu hékk á sínum stað og stemmingin var einstök. Á skólalóðinni stjórnaði Ragna íþróttakennari jólaratleik þar sem nemendur leituðu vísbendinga og bjuggu til orð og í íþróttahúsinu spiluðu nemendur bandý og kubb undir dyggri stjórn Siggu og Guðrúnar. Eftir hádegismat var boðið upp á úrval af jólabíómyndum og að sjálfsögðu fengu allir popp frá yfirpoppurum skólans, Unnari og Óla. Notalegur og skemmtilegur dagur.

Miðvikudaginn 16. desember var laufabrauðs- og smiðjudagur hjá okkur. Þann dag skáru allir nemendur út laufabrauð til að hafa á borðum með hátíðarmatnum á Litlu jólunum. Nemendur úr elsta hópnum aðstoðuðu Huldu yfirsteikingarmeistara við að steikja og pressa. Auk laufabrauðsskurðar fóru nemendur í leiki í íþróttahúsinu, spiluðu og bjuggu til jólaföndur. Ljúfur og góður dagur.

Tíminn flýgur á ljóshraða og það sem eftir lifir vikunnar eru jóladagarnir okkar með fjölbreyttu en þó svolítið hefðbundnu sniði. Hér að neðan er yfirlit yfir þessa daga og við hvetjum ykkur til að fara yfir skipulag þeirra með krökkunum, sér í lagi þeim sem finnst gott að vita vel fyrirfram hvað til stendur. Við gerum það að sjálfsögðu líka hér í skólanum. Miðvikudagur 16. desember. - Jólakósýdagur - laufabrauð og smiðjur Þennan dag verður ýmislegt í boði. Nemendur skera laufabrauð og fara síðan í allskonar skemmtilegar stöðvar eins og t.d spilastöð, föndurstöð og fl. Heimferð þennan dag er á „venjulegum tíma“ kl. 13.30. Fimmtudagur 17. desember. ´- Vasaljósaútistöðvabíópoppdagurinn - Þennan dag höfum við venjulega farið á skauta en það var ekki hægt að þessu sinni. Í þess stað verðum við hér í skólanum og reynum að vera eins mikið úti og við mögulega getum. Vonandi verður veðrið okkur hliðhollt. Mikilvægt að tryggja hlý og góð útiföt, og sundföt. Nemendur verða í útistöðvum frá kl. 9.00 - 11.00. Þessar stöðvar eru útivera í Mörkinni, nemendur fara ratleik, og síðan er bandý og kubb á skólalóðinni. Einnig geta nemendur farið í sund og mun sundlaugin opna kl. 10.15. Eftir hádegismat verður síðan jóla- poppbíó þar sem nemendur horfa á jólamynd og borða popp og drekka sódavatn með, ef þeir vilja. Heimferð er kl.13.30. Föstudagur 18. desember. - Litlu jólin. Spariföt Kl. 8.20 - 8.40 - Heimastofa, fara yfir dagskrá dagsins. Kl. 8.40 - 9.00 - Morgunmatur Kl. 9.10 - Brottför í jólastund með Oddi Bjarna á Möðruvöllum. Skólavinir sitja saman, bæði í skólabílum og í kirkjunni. Kl. 10.10 - Kósýstund og söngur hjá jólatrénu okkar. Kl. 10.40 -11.15 - Stofujól Kl. 11.15 - 11.45 - Hátíðarmatur við dekkað borð í matsal. Kl. 12.00 - Heimferð og nemendur komnir í jólafrí.

Ein hátíðlegasta hefð skólans er jólaljósadagurinn. Þá arka allir nemendur upp í hlíðina fyrir ofan skólann og kveikja þar á útikerti til þess að fagna komu jólanna. Það er ekkert hátíðlegra en að sjá jólaljósin lýsa upp snævi þakta hlíðina. Svo er alltaf gott að fá birtu í lífið og tilveruna, nú þegar sólargangur styttist með hverjum deginum. Þegar búið var að kveikja á kertunum fóru nemendur niður að skóla og gengu kringum stóra jólatréð sem er staðsett við skólann. Birgitta á Möðruvöllum mætti með drónann sinn og tók fallegar loftmyndir af skólasvæðinu. Við þökkum henni kærlega fyrir það. Einnig viljum við nota þetta tækifæri og þakka lögreglunni á Akureyri fyrir aðstoðina við að auka öryggi nemenda okkar þegar við fórum með þau yfir þjóðveginn. Hér eru nokkrar myndir sem teknar voru í dag.

Eins og hefð er fyrir í lok nóvember voru jólatré skólans sótt upp í skógræktina fyrir ofan skólann. Þetta er hlutverk 1. og 2. bekkinga sem sækja litla tréð sem dansað er í kringum á litlu jólunum og síðan 8. bekkinga sem sækja stóra jólatréð sem sett er upp á skólalóðinni. Oft hefur þetta verið töluverð erfiðisvinna vegna snjóalaga en ekki að þessu sinni því jörð var nánast auð. Hér eru myndir sem teknar voru þegar 1. og 2. bekkur náði í sitt tré og hér myndir þegar 8. bekkingar sóttu stóra tréð.

Líkt og í fyrra tók Þelamerkurskóli þátt í verkefninu Jól í skókassa. Jól í skókassa er verkefni á vegum KFUM&KFUK sem gengur út á að fá fólk til að útbúa jólagjöf handa barni í Úkraínu, en þar glíma margir við sára fátækt, alltof mörg börn búa á munaðarleysingjaheimilum og búa þar við döpur kjör. Að þessu sinni skiluðu nemendur skólans 34 kössum í verkefnið. Foreldrar voru mjög hjálpsamir við að afla aðfanga til verkefnisins og nemendurnir pökkuðu inn kössunum og röðuðu í þá. Með þátttöku í verkefninu viljum við undirstrika hversu mikilvægt og gaman það er að hjálpa öðrum og hve samkennd skiptir miklu máli. Það er mikilvægt að geta sett sig í spor annarra og glatt aðra. Hér eru myndir frá vinnu nemenda.

Það er vart til þjóðlegri matur en lifrapylsa og blóðmör og mörg heimili taka slátur á haustin. Eins og allir vita þá er slátur bæði hollur og góður matur og því nauðsynlegt fyrir alla að læra hvernig maður býr til þennan þjóðlega mat. Þrátt fyr­ir að yf­ir­leitt sé það eldri kyn­slóðin sem kann yfirleitt til verka í slát­ur­gerðinni teljum við að nauðsynlegt að yngri kynslóðin læri hand­tök­in við sláturgerðina. Það er löng hefð fyrir því í Þelamerkurskóla að nemendur miðstigs búi til lifrapylsu og blóðmör með umsjónarkennurum sínum. Sláturdagurinn fór fram þann þriðjudaginn þann 27. október. Eins og alltaf stóðu krakkarnir sig með miklum sóma og verkið vannst bæði hratt og vel. Slátrið verður síðan á borðum í mötuneytinu í vetur. Hér eru nokkrar myndir sem teknar voru á sláturdaginn.