Fréttir

Eftir alls kyns hindranir í að komast í skíðaskólann okkar góða sl. tvö ár, náðum við þremur dögum í ár, með smá tilfærslum! Það var hreint stórkostlegt að sjá nemendur eflast og styrkjast í skíðaiðkun sinni og sum þeirra sem stigu í fyrsta sinn á skíði á degi eitt, voru orðin örugg og sjálfbjarga strax á degi tvö. Magnað alveg!

Þann 18. febrúar sl. buðu 6. bekkingar öllum sér yngri nemendum á þorrablót. Nemendur höfðu fyrr í vetur búið sjálfir til hluta af þorramatnum, s.s. slátur og sviðasultu og auk þess var boðið upp á hákarl, súrmat, hangikjöt og allt sem tilheyrir góðu þorrablóti. Flestir nemendur borðuðu vel og smökkuðu jafnvel nýjar afurðir! Nemendur 6. bekkjar stýrðu boðinu vel, Sigrún Magna og Margrét spiluðu undir fjöldasöng og að áti loknu, var boðið upp á skemmtiatriði í stofu 6. bekkinga. Frábær stund. Takk fyrir okkur 6. bekkingar.

Skólastarf janúarmánaðar einkenndist af alls kyns skapandi þemaverkefnum, vinnu við áhugasviðsverkefni, útiskóla, bóklegum tímum, myndbandaverkefni í ýmsum námsgreinum, læsisverkefnum í sundi og spennandi sköpun í valgreinum. Auk þess fengu 7.-10. bekkur Þorgrím Þráinsson í heimsókn með stórgott erindi um leiðir til að auka sjálfstraust sitt og stuðla að góðu lífi, Ragna íþrótta- og heimilisfræðikennari setti upp frábæra dagskrá í tannverndarvikunni, sem endaði á fyrirlestri um tannheilsu frá Mörthu Hermannsdóttur tannlækni sem og flúorskoli og tannburstagjöf fyrir alla nemendur.

Nemendur í 7.-8. bekk eru með fasta áhugasviðstíma í hverri viku og hafa litið dagsins ljós hreint frábær verkefni hjá þeim öllum. Krakkarnir vinna í nokkrar vikur með hvert verkefni og enda lotuna á kynningum á sínu áhugasviði. Í skólann hafa komið skemmtilegir gestir til að taka þátt í slíkum kynningum, s.s. endur og kettir auk þess sem bakaðar hafa verið pizzur og ýmsir flottir munir lagðir fram.

Í þessari frétt setjum við saman myndasöfn frá hinum ýmsu jólatengdu dögum þar sem margra ára gamlar hefðir skapa fegurð, gleði og öðruvísi samverustundir sem eru góð tilbreyting frá annars fjölbreyttu skólastarfi. Með því að smella á yfirheiti hverrar umfjöllunar opnast myndasafn frá viðkomandi viðburði. Jól í skókassa: Nú má gera ráð fyrir að börn í Úkraínu séu um það bil að fá afhentar jólagjafir frá nemendum Þelamerkurskóla, en nemendur úr skólanum fengu þá hugmynd fyrir nokkrum árum að við myndum öll sameinast um að útbúa Jól í skókassa fyrir börn sem annars ekki fá gjafir. Góð hugmynd sem orðin er að hefð. Jólaljósadagurinn: Snemma í desember höfum við sl. 20 ár byrjað daginn á að fara upp í hlíðina við skóginn á móti skólanum, þar sem hver nemandi skólans kveikir á sínu friðarkerti til að lýsa upp skammdegið og njóta fegurðar og friðar. Falleg hefð og uppáhaldsdagur margra. Laufabrauðsskurður og jólastöðvar, skautar og jólabíó: Síðustu dagana fyrir jólafrí var að venju notaleg stemming. Einn dagur fór í að skera út laufabrauð og skemmta sér svo á fjölbreyttum og skemmtilegum stöðvum, s.s. við forritun og tækni, jólaföndur, piparkökuskreytingar, slökun, perl, íþróttir og sund. Annar dagur var nýttur í jólaskautaferð, gönguferð á Akureyri og jólabíó. Í ár komum við nemendum skemmtilega á óvart með því að hafa jólabíóið „alvöru“ bíóferð í bíóhús á Akureyri. Krakkarnir fögnuðu gríðarlega þegar þeim var tilkynnt það rétt áður en bíóið hófst. Litlu jólin: Litlu jólin okkar voru nokkuð hefðbundin með heimsókn í Möðruvallakirkju þar sem nemendur fluttu tónlist og tal af stakri snilld, stofujólum með kennara og svo hátíðarmat í matsalnum. Allir voru prúðbúnir og virtust njóta dagsins vel.

Starfsfólk Þelamerkurskóla óskar öllum nemendum og fjölskyldum þeirra gleðilegra jóla og farsældar á nýju ári, með hjartans þökk fyrir gott og gefandi samstarf á árinu sem senn er á enda.