Fréttir

Þriðjudaginn 9. mars var Stóra upplestrarkeppnin haldin í Menntaskólanum á Akureyri. Stóra upplestrarkeppnin í 7. bekk er árlegt samvinnuverkefni flestra grunnskóla á landinu og Radda, samtaka um vandaðan upplestur. Í verkefninu fá allir nemendur í 7. bekk markvissa þjálfun í upplestri og framkomu. Skáld hátíðarinnar voru Kristján frá Djúpalæk og Bergrún Íris Sævarsdóttir. Fulltrúar Þelamerkurskóla í ár voru Anna Lovísa Arnardóttir og Helena Arna Hjaltadóttir nemendur í 7. bekk. Þær stóðu sig mjög vel og við erum virkilega stolt af þeim. Anna Lovísa fékk önnur verðlaun fyrir sinn lestur. Þátttökuskólar að þessu sinni voru Dalvíkurskóli, Grunnskólinn Fjallabyggð, Hrafnagilsskóli, Grenivíkurskóli og Þelamerkurskóli.

Hið árlega þorrablót 1. - 6. bekkjar var haldið í skólanum í dag. Nemendur borðuðu þorramat og sungu þorrasöngva með undirleik Jóns Þorsteins tónmenntakennara. Eins og hefð er fyrir var skipulag dagsins í höndum 6. bekkjar og umsjónarkennara þeirra. Skemmtunin tókst mjög vel og allir nutu þess að borða þorramatinn. Hér má sjá nokkrar myndir frá skemmtuninni.

Í gær, fimmtudaginn 25. febrúar fór upplestrarhátíð skólans fram. Á henni lesa nemendur 7. bekkjar upp fyrir nemendur, foreldra og starfsfólk skólans. Úr hópnum velur dómnefnd fulltrúa skólans til að lesa á lokahátíð Stóru upplestrakeppninnar. Að þessu sinni skipuðu dómnefndina Helga Hauksdóttir, Margrét Sverrisdóttir og Snorri Finnlaugsson. Allir nemendur lásu sérstaklega vel og var dómnefndinni sannarlega vandi á höndum. Dómnefndin valdi Helenu Örnu Hjaltadóttur og Önnu Lovísu Arnardóttur til að verða fulltrúa skólans á lokahátíðinni sem fer fram þann 9. mars nk. Lokahátíðin fer fram í Menntaskólanum á Akureyri þann 9. mars og hefst kl. 17.00. Hér eru myndir sem teknar voru á upplestrarhátíðinni.

Öskudagurinn var haldinn hátíðlegur í skólanum daginn fyrir öskudag eins og undanfarin ár. Nemendur og starfsfólk klæddust grímubúningum og grínuðu og glensuðu. Kötturinn var slegið úr tunnunni og þetta árið var það Jónatan Smári sem var tunnukóngur skólans. Síðan hófst söngvakeppni öskudagsliða. Eftir söngvakeppnina var síðan dansað og sprellað fram að heimferð.

Eins og hefð er fyrir verður öskudagsgleði Þelamerkurskóla á sprengidaginn sem er þriðjudaginn 16. febrúar. Nemendur geta komið strax um morguninn í búningum sínum og máluð, en fram að hádegi er kennt samkvæmt stundaskrá. Hádegismatur verður frá kl. 12.00 – 12.30 og frá 12.30 – 13.00 undirbúa nemendur sig fyrir öskudagsballið. Þeir sem þurfa aðstoð við málun fá hana í stofu 3. Öskudagsskemmtunin hefst á sal kl. 13.00. Dagskrá hennar er: Kötturinn sleginn úr tunnunni Tunnukóngur/drottning krýnd/ur Söngvakeppni öskudagsliða Öskudagsball Úrslit úr söngvakeppninni Marsering undir stjórn elsta námshópsins Skólavinir marsera saman Skólarútur fara heim á venjulegum tíma eða kl. 14.25. ATH: Það verður vetrarleyfi í skólanum 17. - 19. febrúar

Hinn mánaðarlegi læsisviðburður okkar í skólanum, Allir lesa, var í dag. Nemendur þekkja Allir lesa vel og kalla eftir því ef þeim finnst tíminn fram að næsta Allir lesa of lengi að líða. Nemendur dreifa sér um skólann með lesefni í hönd og á hverju svæði er fullorðinn lestrarfyrirmynd.

Í hverri viku er í skólanum unnið með Orð vikunnar. Orðin eru rýnd í bak og fyrir, nemendur finna skyld orð, pæla í merkingu orðsins, búta orðið niður í litlar einingar og leika sér með það á fjölbreyttan hátt. Markmiðið með orðarýni er að efla orðvitund nemenda, orðaforða þeirra og áhuga á tungumálinu. Afrakstur vinnunnar hangir svo á vegg í matsal skólans.

Í hönnun og smíði hjá 1. og 2. bekk fengu nemendur það verkefni að búa til pennastatíf úr lerki sem fellt var fyrir nokkrum árum i Mörkinni. Í innlögn kennara fengu nemendur m.a. kynningu á íslenskum trjátegundum eins og birki, lerki og greni. Öllum trjátegundum má skipta í tvo aðalflokka þ.e barrtré og lauftré. Lauftré fella laufin á haustin en barrtrén eru sígræn. Lauftré gefa af sér við sem kallaður er harðviður en viður barrtrjáa er kallaður mjúkviður. Einnig var nemendum sýndur þverskurður af tré og þeim sýnt hvernig finna má út aldur trjáa með því að telja árhringina í trénu. Að innlögn lokinni fengu nemendur viðarbútinn sinn sem þau byrjuðu á að pússa. Síðan hófst vinnan við það að mæla og merkja fyrir staðsetningu á holunum sem bora átti í spýtuna. Síðan fengu nemendur nagla sem þeir notuðu til þess að merkja holurnar betur. Svo voru holurnar boraðar í súluborvél. Að því loknu var viðarolía borinn á lerkibútinn. Verkefnið heppnaðist vel og nemendur unnu vel í tímanum. Tveir eldri nemendur voru okkur til aðstoðar og hjálpuðu þeim nemendum sem voru ragir við það að bora sjálfir.

Eins og fram kemur í skóladagatali og Dagskrá Þelamerkurskóla fyrir janúar er foreldadagur í skólanum á morgun og nemendur mæta því ekki í skólann.

Ákveðið hefur verið að fresta árshátíð skólans sem vera átti fimmtudaginn 4. febrúar vegna kór­ónu­veirunn­ar. Ákvörðunin er tek­in í varúðarskyni en stefnt er að því að halda árs­hátíðina fimmtudaginn 25. mars.