Fréttir

Þrátt fyrir þokuslæðing og vætu á köflum létu nemendur og starfsfólk engan bilbug á sér finna og áttu góðan útivistardag sl. miðvikudag. Fjórar ferðir voru á dagskrá og þótt tveir áfangastaðir hafi breyst vegna veðurs hélst fyrirkomulag ferðanna nokkuð svipað. Krakkarnir glímdu við miskrefjandi verkefni í t.d. göngu eða hjólreiðum, en allir stóðu sig frábærlega og voru ánægðir með sig að ferð lokinni. Sundlaugin yljaði þreyttum kroppum eftir atið og í mötuneytinu var boðið upp á skúffuköku og mjólk í kaffitímanum, áður en haldið var heim á leið.

Áætlað er að vera með útivistardag haustannar miðvikudaginn 2. september. Dagurinn verður með svipuðu sniði og undanfarin ár, þ.e farið verður í með 1. – 4. bekk í þægilega gönguferð en 5. – 10. bekkur hefur val um þrjár leiðir. Þar sem enn á eftir að útfæra nokkur atriði betur verða nánari upplýsingar um útivistardaginn sendar til ykkar í tölvupósti næsta mánudag. Þetta er langur dagur svokallaður tvöfaldur skóladagur og því verður heimferð nemenda ekki fyrr en kl. 16.00. Eftir ferðirnar geta nemendur farið í sturtu og sund og því þurfa þau að muna eftir sundfötunum

Þelamerkurskóli var settur í Mörkinni mánudaginn 24. ágúst. Veðrið var eins og best á var kosið sól og hiti. Hér eru nokkrar myndir sem teknar voru á skólasetningunni.

Samkvæmt ákvæðum í skólastefnu Hörgársveitar frá árinu 2016 fór fram endurskoðun á stefnunni sl. skólaár. Nú hefur ný og endurskoðuð skólastefna litið dagsins ljós og hana má finna á heimasíðu Hörgársveitar eða á þessari slóð hér. Eins má smella á Skólastefnuhnapp neðarlega til hægri á heimasíðu skólans.

Þelamerkurskóla var slitið fimmtudaginn 4. júní. Skólaslit 1. - 6. bekkjar fóru fram á sparkvelli skólans en skólaslit 7. - 10. bekkjar í Hlíðarbæ seinna sama dag. Sjö nemendur 10. bekkjar voru brautskráðir og sex nemendur 1. bekkjar voru boðnir velkomnir í skólann. Á fyrri skólaslitunum voru veitt tvenn verðlaun. Það voru verðlaun fyrir hönnun og smíðar og sólskinsverðlaun skólans. Verðlaun í hönnun og smíðum komu í hlut Ylfu Sólar Agnarsdóttur sem er nemandi í 3. bekk. Verðlaunin hlaut Ylfa Sól fyrir framúrskarandi árangur í hönnun og smíðum og mikla verkhæfni miðað við aldur. Á fyrri skólaslitunun voru sólskinsverðlaunum Þelamerkurskóla einnig afhent en þau eru veitt nemendum sem leggja sig sérstaklega fram, skólastarfinu til hagsbóta. Sólskinsverðlaunin 2019-2020 hlýtur nemandi sem ávallt sýnir mikla jákvæðni og er einstaklega samvinnufús og hjálpsamur. Þessi viðurkenning kom í hlut Elínar Öldu Bragadóttur 6. bekk. Á seinni skólaslitunum sem haldin voru í Hlíðarbæ voru veitt fern verðlaun. Fyrst voru það Jónasarverðlaunin sem Jónasarsetur, Menningarfélagið Hraun í Öxnadal veitir útskrifarnemendum viðurkenningu í minningu Jónasar Hallgrímssonar. Í ár var mjög erfitt að gera upp á milli nemenda og gátu mjög margir fengið verðlaun fyrir námsárangur. Að lokum stóð valið á milli tveggja framúrskarandi nemenda sem ekki var hægt að gera upp á milli núna frekar en áður á skólagöngu þeirra. Þessir tveir nemendur eru alltaf tilbúnir til að taka þátt í þeim verkefnum sem fyrir þá eru lögð, gera það með bros á vör og skila oftast mjög góðu verki. Þetta eru þær Álfhildur Helga Ingólfsdóttir og Bjarney Viðja Vignisdóttir nemendur í 10. bekk. Viðurkenningu fyrir hannyrðir hlaut Auður Karen Auðbjörnsdóttir í 9. bekk. Auði hefur farið mikið fram í vetur og er hún mjög sjálfstæð í vinnu sinni. Hún er vandvirk, hugmyndarík og óhrædd við að prufa nýjar aðferðir. Ástundunarverðlaun skólans kom í hlut Ólafar Eyrúnar Bragadóttir í 10. bekk. Ólöf hefur sinnt náminu af mikilli prýði í vetur og hefur sýnt einstakan áhuga og þrautseigju. Að lokum var íþróttamaður Þelamerkurskóla tilnefndur. Í ræðu skólastjóra kom fram að skólinn er ríkur af öflugu íþróttafólki en fyrir valinu í ár varð nemandi sem er mikill íþróttamaður. Hann leggur sig fram í tímum, tilbúinn að hjálpa öðrum og er flottur liðsmaður. Hann er mikill keppnismaður og gefur sjaldan eftir. Íþróttamaður Þelamerkurskóla skólaárið 2019 - 2020 er Jónsteinn Helgi Þórsson nemandi í 10. bekk. Þrír kennarar voru kvaddir á skólaslitunum Ágústa Berglind Hauksdóttir, sem verið hefur í leyfi í vetur og óskaði eftir lausn frá starfi. Við þökkum henni fyrir vel unnin störf og skemmtilegan félagsskap til margra ára. Jónína Sverrisdóttir er búin að starfa í Þelamerkurskóla í 20 ár. Hún hefur nú ákveðið að komið sé að tímamótum og mun nú snúa til annarra starfa. Jónínu eru færðar hjartans þakkir fyrir frábær störf í þágu nemenda og skólans alls öll þessi ár. Sigurður F. Sigurðarson kom til okkar í haust í afleysingu og átti góðar stundir og vann flott og hugmyndaríkt starf með unglingadeildinni. Við þökkum Bibba kærlega fyrir hans framlag í vetur. Tveir nýir kennarar hefja störf við skólann í ágúst, en það eru þau Hjördís Stefánsdóttir, sem fer í teymi yngsta stigs og Helga Kolbeinsdóttir sem mun sjá um list- og verkgreinakennslu við skólann. Við bjóðum þær tvær velkomnar til starfa, en Helga er kominn inn í hópinn eftir að hafa verið hjá okkur í afleysingu í vetur. Þelamerkurskóli verður settur þann 24. ágúst 2020

Þriðjudaginn 2. júní var farið með alla nemendur skólans í vorferð til Dalvíkur. Við skoðuðum Byggðasafnið Hvol á Dalvík sem er lítið en fjölbreytt og skemmtilegt safn. Þar er meðal annars hægt að fræðast um líf og starf Jóhanns Svarfdælings sem var stærsti Íslendingur sem sögur fara af. Við fæðingu vó Jóhann 18 merkur og var hann þriðja barn foreldra sinna af níu systkinum. Jóhann var 2,34 metrar á hæð þegar hann mældist hæstur og vó þá 163 kg. Einnig fengu nemendur að prófa að fara í minigolf og klifra í klifurvegg. Í hádeginu var boðið upp á grillaða hamborgara sem runnu ljúft niður. Síðan brugðu nemendur sér í sund í Sundlaug Dalvíkur. Við fengum gott veður þennan dag og þegar veðrið er gott eru allir glaðir.

Hver dagur í Þelamerkurskóla hefst á Mílugöngu nemenda og starfsfólks. Mílan er hugmynd sem á upptök sín í Skotlandi, en markmiðið með Mílunni er að efla andlega og líkamlega heilsu nemenda og starfsfólks. Búið er að stika 400 metra hring við skólann og eru gengnir lágmark fjórir hringir og tekur gangan um 15-20 mínútur. Að göngu lokinni fara allir inn að lesa fram að morgunmat. Í Mílunni anda allir að sér súrefni á meðan þeir spjalla um daginn og veginn ýmist við félaga sína eða starfsfólk skólans, njóta umhverfisins í ró með sjálfum sér eða taka á sprett og líta á þetta sem góða hlaupaæfingu í morgunsárið.

Í tímanum Hreyfing og heilsa hjá 7. og 8. bekk unnu nemendur að því að undirbúa matjurtargarð, en kennarar fengu þá hugmynd um daginn að fá nemendur með sér í lið við að búa til matjurtargarð við skólann og vinna með því að markmiðum er lúta meðal annars að sjálfbærni, hreyfingu, sköpun, samvinnu, verkfærni og heimilisfræði. Nemendur í öðrum bekkjum skólans munu svo halda áfram með verkefnið í næstu viku og er stefnt að því að allir nemendur komi á einhvern hátt að vinnu við ræktunina.

Við Þelamerkurskóla er laus til umsóknar staða list- og verkgreinakennara með áherslu á kennslu í hannyrðum, myndmennt og tónmennt.