Fréttir

Við hófum daginn í dag á jólaljósaferðinni okkar þar sem við kveiktum á um 70 friðarkertum til að lýsa upp aðventuna og njóta fegurðar og friðar. Skólavinir hjálpuðust að og allt gekk eins og í sögu. Að ljósaferð lokinni sungum við og dönsuðum í kringum jólatréð við undirleik Jóns Þorsteins og Kristjáns frá tónlistarskólanum. Þá tók við kósýdagur þar sem nemendur flökkuðu á milli stöðva að eigin vali. Þar varð til fjöldi listaverka í myndmennta- og smíðastofunum auk þess sem nemendur skáru út laufabrauð, spiluðu, forrituðu, prófuðu nýjustu græjur skólans og fengu nudd, slökun og naglalakk.

Um miðbik nóvember var kynning á afrakstri þemaverkefnis á unglingastigi. Þemaverkefnið snerist um það að unglingarnir útbjuggu 2000 manna þorp frá grunni. Þau þurftu að gera sér grein fyrir því hvaða þjónustu þau vildu hafa, hvernig húsnæði, hvaða atvinnu, hvernig sorp- og fráveitumálum væri háttað, það þurfti heitt og kalt vatn og þar fram eftir götunum. Þau þurftu að staðsetja þorpið á eða við landið og hanna húsin, bæði íbúðar- og atvinnuhúsnæði. Krakkarnir luku þemaverkefni um þorpin með glæsibrag og héldu kynningu þriðjudaginn 19. nóvember! Gaman var að sjá hversu margir sáu sér fært að koma og ljúka þessu verkefni með okkur. Heilt á litið finnst okkur verkefnin hafa gengið vel, krakkarnir hafa lært helling af þessu (þó þeir átti sig kannski ekki á því til fullnustu). Íslenskan kom inn sem framsögn og ritun á kynningu, stærðfræðin poppaði upp við að minnka hús og önnur mannvirki og hafa það allt í réttum hlutföllum, náttúrufræðin kom inn í umhverfismenntun. Upplýsingatækni birtist í bæklingum og þar voru enskan og danskan innvinkluð í verkefnið. Smíðar voru nýttar í gerð líkana og myndmennt í málun. Hönnun kom sterk inn þegar þorpið var ákveðið og síðast en ekki síst var samfélagsfræðin tekin fyrir í þorpinu sjálfu, samfélaginu, hvað það þurfti og hvað var hægt að samnýta. Samvinna var svo lykilþátturinn í allri vinnunni.

Í næstu viku, síðustu vikunni fyrir jólafrí, verður margt um að vera og með því að smella á fréttinna má sjá yfirlit yfir dagskrá hvers dags fyrir sig.

Þar til annað kemur í ljós er gert ráð fyrir eðlilegu skólahaldi á morgun, fimmtudag, en það veltur þó á því hvernig gengur að ryðja burt þessum þunga snjó af vegum og heimreiðum. Við verðum með puttann á púlsinum og biðjum alla aðstandendur að fylgjast vel með tilkynningum í fyrramálið, ýmist í tölvupósti, útvarpi eða á heimasíðu og facebook síðu skólans. Verði einhver röskun á skólastarfinu verður jafnframt sent út sms, eins og venjulega þegar það gerist. Við vonum innilega að veðrið hafi ekki valdið neinum skaða og hugsum til þeirra sem glíma við rafmagnsleysi. Vonandi leysist úr því sem fyrst.

Í síðustu viku fengu 6. - 7. bekkur skólans kennslu í endurlífgun. Susanne skólahjúkrunarfræðingur sá um kennsluna ásamt öðrum hjúkrunarfræðingi. Í bréfi sem skólain fékk stendur m.a. að undanfarið ár hafi verið í undirbúningi að innleiða verkefnið „Börnin bjarga“ í heilsuvernd skólabarna. Verkefnið gengur út á að kenna nemendum í 6. – 10. bekk markvisst og árlega endurlífgun. Kennslan er í formi fyrirlesturs og verklegrar kennslu með einföldum endurlífgunardúkkum. Þetta verkefni er hluti af átakinu Kids save lives, sem Endurlífgunarráð Evrópu (ERC) og Alþjóða heilbrigðismálastofnunin (WHO), settu af stað í þeim tilgangi að hvetja allar þjóðir heims til þess að innleiða endurlífgunarkennslu meðal grunnskólanema. Rannsóknir sýna að slík kennsla eykur fjölda þátttakenda í endurlífgun umtalsvert og bætir lífslíkur í kjölfar hjartastopps utan spítala svo um munar.

Einu sinni í hverjum mánuði hringir skólastjóri inn í Allir lesa stund og í dag var Allir lesa stund desembermánaðar. Nemendur og starfsfólk dreifðu sér sem fyrr um allan skóla og það er alltaf jafn vinsælt að koma sér fyrir t.d. á kaffistofu starfsfólks eða skrifstofu skólastjórnenda og sökkva sér niður í lesefni að eigin vali í 20 mínútur. Á öllum svæðum hafa nemendur fyrir augunum fullorðna lestrarfyrirmynd. Sumir völdu að láta lesa fyrir sig meðan aðrir lásu einir í ró eða tveir saman. Dýrmæt stund sem hefur jákvæð áhrif á læsi allra. Þess má geta að lestraráhugi hefur samkvæmt mælingu aukist á milli ára hjá nemendum skólans.